ស្មាយ ងាយស្រួលការពារកម្ចី ផ្លាស់⁽⁺⁾

“ក្រុមហ៊ុន” សំដៅដល់ ក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ អឹសួរ៉ិនស៍ ភីអិលស៊ី។

“បណ្ណសន្យារ៉ាប់រង” សំដៅដល់ បណ្ណសន្យារ៉ាប់រងអាយុជីវិត ដែលជាឯកសារចងភ្ជាប់កាតព្វកិច្ចតាមផ្លូវច្បាប់ ដែលចេញដោយ ក្រុមហ៊ុន ដោយមានកំណត់ពីខ្លឹមសារសំខាន់ និងចែងពី ខ និងលក្ខខណ្ឌលម្អិត ដែលបានព្រមព្រៀងរវាងក្រុមហ៊ុន និងម្ចាស់បណ្ណសន្យារ៉ាប់រង និង/ឬសមាជិកដែលត្រូវបានធានា ក្នុងកិច្ចសន្យាធានារ៉ាប់រង។

“កិច្ចសន្យាធានារ៉ាប់រង” សំដៅដល់ កិច្ចព្រមព្រៀងជាលាយលក្ខណ៍អក្សរ ដែលធ្វើឡើងដោយក្រុមហ៊ុន ម្ចាស់បណ្ណសន្យារ៉ាប់រង និងសមាជិកដែលត្រូវបានធានា ដែលតាមរយៈនោះក្រុមហ៊ុនព្រមទទួលនូវហានិភ័យជាក់លាក់ណាមួយ ដោយទទួលមកវិញនូវការបង់បុព្វលាភរ៉ាប់រងពី សមាជិកដែលត្រូវបានធានា និង/ឬម្ចាស់បណ្ណសន្យារ៉ាប់រង។ កិច្ចសន្យាធានារ៉ាប់រងរួមមាន បណ្ណសន្យារ៉ាប់រង ផលិតផលបន្ថែម តារាងបណ្ណសន្យារ៉ាប់រង ឯកសារភ្ជាប់ សេចក្តីប្រកាសបន្ថែម ឯកសារគាំទ្រវិសោធនកម្មនៃបណ្ណសន្យារ៉ាប់រង ឬសំណើសុំផ្លាស់ប្តូរដែលចុះហត្ថលេខាទទួលស្គាល់ដោយក្រុមហ៊ុន ពាក្យស្នើសុំធានារ៉ាប់រង របាយការណ៍សុខភាពពីវេជ្ជបណ្ឌិត និងសេចក្តីប្រកាសអំពីសុខភាព ដែលឯកសារទាំងនេះត្រូវបានចាត់ទុកថាជាកិច្ចសន្យាធានារ៉ាប់រងរវាងម្ចាស់បណ្ណសន្យារ៉ាប់រង/សមាជិកដែលត្រូវបានធានា និងក្រុមហ៊ុន។

“បុព្វលាភរ៉ាប់រង” សំដៅដល់ ចំនួនទឹកប្រាក់ដែលសមាជិកដែលត្រូវបានធានា និង/ឬម្ចាស់បណ្ណសន្យារ៉ាប់រង ត្រូវបង់ទៅឲ្យ ក្រុមហ៊ុនជាថ្នូរនឹងបណ្ដាកាតព្វកិច្ចដែលរ៉ាប់រងដោយក្រុមហ៊ុន។

“ការធានារ៉ាប់រងដោយមិនមានការរួមវិភាគទាន” សំដៅដល់ ការធានារ៉ាប់រងដែលម្ចាស់បណ្ណសន្យារ៉ាប់រងបង់បុព្វលាភរ៉ាប់រងទាំង ស្រុង។

“ការធានារ៉ាប់រងដោយមានការរួមវិភាគទាន” សំដៅដល់ ការធានារ៉ាប់រងដែលម្ចាស់បណ្ណសន្យារ៉ាប់រងបង់បុព្វលាភរ៉ាប់រងមួយផ្នែក ហើយសមាជិកដែលត្រូវបានធានាចូលរួមវិភាគទានមួយផ្នែកទៀត ឬ ការធានារ៉ាប់រងដែលសមាជិកដែលត្រូវបានធានាបង់បុព្វលាភរ៉ាប់រងទាំងស្រុង។

“តារាងបណ្ណសន្យារ៉ាប់រង” សំដៅដល់ តារាងដែលមានកំណត់ព័ត៌មានលម្អិតនៃបណ្ណសន្យារ៉ាប់រងដែលចេញដោយក្រុមហ៊ុនដែលត្រូវបានចាត់ទុកជាឯកសារបន្ថែមនៃបណ្ណសន្យារ៉ាប់រងដែលជាផ្នែកមួយនៃកិច្ចសន្យាធានារ៉ាប់រងនេះ។

“ម្ចាស់បណ្ណសន្យារ៉ាប់រង” សំដៅដល់ នីតិបុគ្គលដែលជាអ្នកផ្តល់កម្ចី និងជាអ្នកទទួលផលទីមួយ ដូចមានបញ្ជាក់នៅក្នុងបណ្ណសន្យារ៉ាប់រងនេះ។

“ឥណវន្ត” សំដៅដល់ កូនបំណុលរបស់ម្ចាស់បណ្ណសន្យារ៉ាប់រង ដែលខ្ចីកម្ចីពីម្ចាស់បណ្ណសន្យារ៉ាប់រង។

“កាលបរិច្ឆេទបណ្ណសន្យារ៉ាប់រងមានសុពលភាព” សំដៅដល់ កាលបរិច្ឆេទដែលកិច្ចសន្យាធានារ៉ាប់រងចាប់ផ្តើម។

“កាលបរិច្ឆេទបណ្ណសន្យារ៉ាប់រងមានសុពលភាពរបស់សមាជិកដែលត្រូវបានធានា” សំដៅដល់ កាលបរិច្ឆេទដែលទឹកប្រាក់កម្ចីត្រូវបានផ្តល់ពីម្ចាស់បណ្ណសន្យារ៉ាប់រងទៅសមាជិកដែលត្រូវបានធានា និងក្រុមហ៊ុនទទួលបានបុព្វលាភរ៉ាប់រង ហើយក្រុមហ៊ុនយល់ព្រមធានាសមាជិកដែលត្រូវបានធានា។ កាលបរិច្ឆេទនេះ ត្រូវចាត់ទុកថាជាកាលបរិច្ឆេទកិច្ចសន្យាធានារ៉ាប់រងមានសុពលភាព សម្រាប់សមាជិកដែលត្រូវបានធានាក្នុងបណ្ណសន្យារ៉ាប់រងនេះ។

“ខួបនៃបណ្ណសន្យារ៉ាប់រង” សំដៅដល់ ខួបនៃកាលបរិច្ឆេទបណ្ណសន្យារ៉ាប់រងមានសុពលភាព ឬកាលបរិច្ឆេទនៃការបន្តបណ្ណសន្យារ៉ាប់រង ឬកាលបរិច្ឆេទផ្សេងទៀតដែលបានបញ្ជាក់ក្នុងតារាងបណ្ណសន្យារ៉ាប់រង។

“ឆ្នាំនៃបណ្ណសន្យារ៉ាប់រង” សំដៅដល់ អំឡុងពេលនីមួយៗក្នុងរយៈពេល ១ ឆ្នាំ បន្ទាប់ពីបណ្ណសន្យារ៉ាប់រងមានសុពលភាពអនុវត្ត ឬចាប់ពីកាលបរិច្ឆេទខួបនៃឆ្នាំដែលបណ្ណសន្យារ៉ាប់រងត្រូវបានបន្ត។

“សមាជិកដែលមានសិទ្ធិ” សំដៅដល់ ឥណវន្ត ឬអ្នកខ្ចីប្រាក់ដែលបំពេញតាមលក្ខខណ្ឌតម្រូវទាំងអស់ដូចមានបញ្ជាក់នៅក្នុងផ្នែកទី២ ចំណុចទី១ នៃបណ្ណសន្យារ៉ាប់រងនេះ៖ គុណវុឌ្ឍិរបស់ឥណវន្តដែលមានសិទ្ធិចុះឈ្មោះក្នុងគម្រោងធានារ៉ាប់រង។

“សមាជិកដែលត្រូវបានធានា” សំដៅដល់ សមាជិកដែលមានសិទ្ធិ ដែលចុះឈ្មោះក្នុងគម្រោងធានារ៉ាប់រង ដោយយោងតាមលក្ខខណ្ឌក្នុងផ្នែកទី2 ចំណុចទី2 នៃបណ្ណសន្យារ៉ាប់រងនេះ៖ “ការចុះឈ្មោះ”។

“កាលបរិច្ឆេទចុះឈ្មោះ” សំដៅដល់ ថ្ងៃដែលសមាជិកដែលមានសិទ្ធិ ចុះឈ្មោះក្នុងគម្រោងធានារ៉ាប់រង ជាសមាជិកដែលត្រូវ បានធានា។

“កាលបរិច្ឆេទផុតកំណត់នៃកិច្ចសន្យាធានារ៉ាប់រង” សំដៅដល់ កាលបរិច្ឆេទដែលកិច្ចសន្យាធានារ៉ាប់រងផុតសុពលភាព។

“អ្នកទទួលផល” សំដៅដល់ បុគ្គលដែលបានកំណត់នៅក្នុងពាក្យស្នើសុំធានារ៉ាប់រងដោយសមាជិកដែលត្រូវបានធានា ឲ្យធ្វើជា អ្នកទទួលផល យោងតាមកិច្ចសន្យាធានារ៉ាប់រង និងជាបុគ្គលដែលនឹងត្រូវទទួលអត្ថប្រយោជន៍ទៅតាមបណ្ណសន្យាធានារ៉ាប់រងបន្ទាប់ពីសមាជិកដែលត្រូវបានធានាទទួលមរណភាព ឬពិការភាពទាំងស្រុង និងជាអចិន្ត្រៃយ៍។

“អ្នកទទួលផលទីមួយ” សំដៅដល់ នីតិបុគ្គលដែលជាអ្នកផ្តល់កម្ចី និងជាម្ចាស់បណ្ណសន្យារ៉ាប់រង។

“អ្នកទទួលផលទីពីរ” សំដៅដល់ បុគ្គលដែលត្រូវបានបញ្ជាក់នៅក្នុងពាក្យស្នើសុំធានារ៉ាប់រងដោយសមាជិកដែលត្រូវបានធានាឲ្យក្លាយជាអ្នកទទួលផលដោយយោងតាមកិច្ចសន្យាធានារ៉ាប់រង ហើយដែលនឹងទទួលបានអត្ថប្រយោជន៍ទៅតាមបណ្ណសន្យារ៉ាប់រងនេះ បន្ទាប់ពីកាត់ចេញនូវចំនួនទឹកប្រាក់ដែលត្រូវបង់ទៅឲ្យអ្នកទទួលផលទីមួយ (បើមាន) បន្ទាប់ពីមរណភាពរបស់សមាជិកដែលត្រូវបានធានា។

“គ្រោះថ្នាក់” សំដៅដល់ ព្រឹត្តិការណ៍ដែលកើតឡើងភ្លាមៗដោយកត្តាខាងក្រៅ ហើយដែលលទ្ធផលនោះមិនមែនកើតឡើងដោយចេតនា ឬការតាំងចិត្តរបស់សមាជិកដែលត្រូវបានធានា ហើយដែលបណ្ដាលឲ្យសមាជិកដែលត្រូវបានធានាទទួលមរណភាព ឬទទួលរងនូវពិការភាពទាំងស្រុង និងជាអចិន្ត្រៃយ៍។

“ការរងរបួស” សំដៅដល់ របួសរាងកាយដែលបង្កឡើងដោយគ្រោះថ្នាក់ដោយផ្ទាល់ ហើយមានលក្ខណៈដោយឡែក និងឯករាជ្យពីមូលហេតុផ្សេងៗទៀត។

“ពិការភាពទាំងស្រុង និងជាអចិន្ត្រៃយ៍” សំដៅដល់ សមាជិកដែលត្រូវបានធានាទទួលរងការបាត់បង់ទាំងស្រុង ឬពិការភាពជា អចិន្ត្រៃយ៍ និងមិនអាចជាសះស្បើយជារៀងរហូតនូវ៖

- ដៃទាំងពីរ ឬ
- ជើងទាំងពីរ ឬ
- ដៃម្ខាង និងជើងម្ខាង ឬ
- ភ្នែកទាំងពីរ ឬ
- ភ្នែកម្ខាង និងដៃម្ខាង ឬ

- ជើងម្ខាង និងភ្នែកម្ខាង។

ក្នុងនិយមន័យនេះ ការបាត់បង់ទាំងស្រុង និងមិនអាចជាសះស្បើយបានជារៀងរហូតនូវ (i) ភ្នែកម្ខាង ឬទាំងពីរ សំដៅដល់ការបាត់បង់សរីរាង្គភ្នែកម្ខាង ឬទាំងពីរ ឬពិការភ្នែកទាំងស្រុង (ii) ដៃម្ខាង ឬទាំងពីរ សំដៅដល់ការបាត់បង់ផ្នែកខាងលើនៃកដៃ និង (iii) ជើងម្ខាង ឬទាំងពីរ សំដៅដល់ការបាត់បង់ផ្នែកខាងលើនៃកជើង។

ក្នុងករណីមិនអាចកម្រើកបានជាអចិន្ត្រៃយ៍ ស្ថានភាពនៃពិការភាពទាំងស្រុង និងជាអចិន្ត្រៃយ៍ ត្រូវតែមានការបញ្ជាក់ច្បាស់លាស់ពីវេជ្ជបណ្ឌិតនៅមណ្ឌលសុខភាពកម្រិតឃុំ/សង្កាត់ ឬថ្នាក់ខ្ពស់ជាងនេះ ក្នុងរយៈពេលមិនតិចជាង ១៨០ ថ្ងៃ និងមិនលើសពីរយៈពេល ២៧០ ថ្ងៃ ចាប់ពីពេលមានគ្រោះថ្នាក់ជាយថាហេតុ ឬគិតចាប់ពីថ្ងៃដែលស្ថានភាពពិការភាព ត្រូវបានបញ្ជាក់ត្រឹមត្រូវ។ ក្រុមហ៊ុនសូមរក្សាសិទ្ធិក្នុងការផ្ទៀងផ្ទាត់នូវសុពលភាព ឬភាពត្រឹមត្រូវនៃលិខិតបញ្ជា្កក់សុខភាព និង/ឬ បញ្ជូនសមាជិកដែលត្រូវបានធានាទៅកាន់មន្ទីរពេទ្យផ្សេង ឬ វេជ្ជបណ្ឌិតផ្សេង ដែលការចំណាយលើការពិនិត្យសុខភាពលើកក្រោយនេះជាបន្ទុករបស់ក្រុមហ៊ុន។

ក្នុងករណីដែលបាត់បង់ទាំងស្រុងនូវដៃម្ខាង ឬទាំងពីរ ឬជើងម្ខាង ឬទាំងពីរ ឬភ្នែកម្ខាង ឬទាំងពីរ ការបញ្ជាក់បែបនេះអាចធ្វើឡើងនៅក្នុងរយៈពេលណាមួយក៏បាន ។