ស្មាយ ធានារ៉ាប់រងអាយុជីវិតជាក្រុម

“ក្រុមហ៊ុន” មានន័យថាក្រុមហ៊ុនធានារ៉ាប់រងអាយុជីវិតដូចមានកំណត់ក្នុងវិញ្ញាបនបត្រធានារ៉ាប់រងអាយុជីវិត (ប្រសិនបើមាន)។

“បណ្ណសន្យារ៉ាប់រង” មានន័យថាបណ្ណសន្យារ៉ាប់រងអាយុជីវិតដែលជាឯកសារចងភ្ជាប់កាតព្វកិច្ចតាមផ្លូវច្បាប់ចេញដោយក្រុមហ៊ុន ដោយមានកំណត់ពីខ្លឹមសារសំខាន់ និងចែងពីលក្ខខណ្ឌលម្អិតដែលបានព្រមព្រៀងរវាងក្រុមហ៊ុន និងអ្នកដែលត្រូវបានធានាក្នុងកិច្ចសន្យាធានារ៉ាប់រង។

“កិច្ចសន្យាធានារ៉ាប់រង” មានន័យថាកិច្ចព្រមព្រៀងជាលាយលក្ខណ៍អក្សរ ដែលធ្វើឡើងដោយក្រុមហ៊ុន ម្ចាស់បណ្ណសន្យារ៉ាប់រង និងសមាជិកដែលត្រូវបានធានា ដែលតាមរយៈនោះ ក្រុមហ៊ុនព្រមទទួលនូវហានិភ័យជាក់លាក់ណាមួយ ដោយទទួលមកវិញនូវការបង់បុព្វលាភរ៉ាប់រងពីម្ចាស់បណ្ណសន្យារ៉ាប់រង។ កិច្ចសន្យាធានារ៉ាប់រង រួមមានបណ្ណសន្យារ៉ាប់រង បណ្ណសន្យារ៉ាប់រងបន្ថែម វិញ្ញាបនបត្រធានារ៉ាប់រងអាយុជីវិត ឯកសារភ្ជាប់ សេចក្តីប្រកាសបន្ថែម ឯកសារគាំទ្រវិសោធនកម្មនៃបណ្ណសន្យារ៉ាប់រង សំណើលើការផ្លាស់ប្តូរដែលចុះហត្ថលេខាទទួលស្គាល់ដោយក្រុមហ៊ុន ពាក្យស្នើសុំធានារ៉ាប់រង របាយការណ៍សុខភាពពីវេជ្ជបណ្ឌិត និងសេចក្តីប្រកាសអំពីសុខភាព ឯកសារទាំងនេះត្រូវចាត់ទុកថា ជាកិច្ចសន្យាធានារ៉ាប់រងរវាងម្ចាស់បណ្ណសន្យារ៉ាប់រង សមាជិកដែលត្រូវបានធានា និងក្រុមហ៊ុន។

“តារាងបណ្ណសន្យារ៉ាប់រង” មានន័យថាតារាងដែលបង្ហាញពីសេចក្តីលំអិតនៃបណ្ណសន្យារ៉ាប់រងត្រូវបានចេញដោយក្រុមហ៊ុនដើម្បីជាឯកសារបន្ថែមលើបណ្ណសន្យារ៉ាប់រងនេះ ហើយនិងត្រូវចាត់ទុកជាផ្នែកមួយនៃកិច្ចព្រមព្រៀងនេះ។

“កាលបរិច្ឆេទបណ្ណសន្យារ៉ាប់រងមានសុពលភាព” មានន័យថាកាលបរិច្ឆេទដែលកិច្ចសន្យាធានារ៉ាប់រងចាប់ផ្តើមអនុវត្ត។

“ខួបនៃបណ្ណសន្យារ៉ាប់រង” មានន័យថាអំឡុងពេលមួយ (១) ឆ្នាំដែលចាប់ផ្តើមជាមួយកាលបរិច្ឆេទបណ្ណសន្យារ៉ាប់រងមានសុពលភាព ឬកាលបរិច្ឆេទផ្សេងទៀតដែលបានបញ្ជាក់ក្នុងតារាងបណ្ណសន្យារ៉ាប់រង។

“ឆ្នាំនៃបណ្ណសន្យារ៉ាប់រង” មានន័យថាអំឡុងពេលនីមួយៗក្នុងរយៈពេល មួយ (១) ឆ្នាំ ចាប់ផ្តើមពីកាលបរិច្ឆេទបណ្ណសន្យារ៉ាប់រងមានសុពលភាព ឬ ខួបបន្ទាប់នៃបណ្ណសន្យារ៉ាប់រងបន្តបន្ទាប់។

“សមាជិក” មានន័យថាបុគ្គលដែលត្រូវបានកំណត់ក្នុងតារាងបណ្ណសន្យារ៉ាប់រងដែលបានភ្ជាប់មកជាមួយនេះ។

“សមាជិកដែលមានសិទ្ធិ” មានន័យថាសមាជិក និងបុគ្គលក្នុងបន្ទុក (ប្រសិនបើមាន)ដែលមានសិទ្ធិ អាចចូលរួមក្នុងគម្រោងធានារ៉ាប់រង ក្រោមបណ្ណសន្យារ៉ាប់រងនេះ បន្ទាប់ពីបានបញ្ចប់រយៈពេលរង់ចាំ (ប្រសិនបើមាន) ដែលបានកំណត់ ហើយមានគុណវុឌ្ឍិគ្រប់គ្រាន់ដែលបានកំណត់ក្នុងតារាងបណ្ណសន្យារ៉ាប់រងដែលបានភ្ជាប់មកជាមួយនេះ។

“សមាជិកដែលត្រូវបានធានា” មានន័យថា សមាជិកដែលមានសិទ្ធិ ដែលចូលរួមក្នុងគម្រោងធានារ៉ាប់រងក្រោមបណ្ណសន្យារ៉ាប់រងនេះដោយអនុលោមតាម ខ ដែលបានចែងក្នុងផ្នែកទី ២ ការចូលរួម។

“កាលបរិច្ឆេទនៃការចូលរួម” មានន័យថាកាលបរិច្ឆេទដែលសមាជិកដែលមានសិទ្ធិ ក្លាយជាសមាជិកដែលត្រូវបានធានានៅក្រោមបណ្ណសន្យារ៉ាប់រងនេះ។

“ការធានារ៉ាប់រងមិនរួមវិភាគទាន” មានន័យថាការធានារ៉ាប់រងដែលម្ចាស់បណ្ណសន្យារ៉ាប់រងបង់ បុព្វលាភរ៉ាប់រងទាំងស្រុង។

“ការធានារ៉ាប់រងរួមវិភាគទាន” មានន័យថាការធានារ៉ាប់រងដែលម្ចាស់បណ្ណសន្យារ៉ាប់រងបង់បុព្វលាភរ៉ាប់រងមួយផ្នែក ហើយសមាជិកដែលត្រូវបានធានាមួយផ្នែកទៀត ឬ ការធានារ៉ាប់រងដែលសមាជិកដែលត្រូវបានធានាបង់ បុព្វលាភរ៉ាប់រងទាំងស្រុង។