ស្មាយ ការពារកម្ចីអាជីវកម្ម

“ក្រុមហ៊ុន” សំដៅដល់ ក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ អឹសួរ៉ិនស៍ ភីអិលស៊ី។

“កាលបរិច្ឆេទចុះឈ្មោះ” សំដៅដល់ ថ្ងៃដែលសមាជិកដែលមានសិទ្ធិ ចុះឈ្មោះក្នុងគម្រោងធានារ៉ាប់រង ជាសមាជិកត្រូវបានធានារ៉ាប់រង។

“កាលបរិច្ឆេទបណ្ណសន្យារ៉ាប់រងមានសុពលភាព” សំដៅដល់ កាលបរិច្ឆេទដែលកិច្ចសន្យាធានារ៉ាប់រងចាប់ផ្ដើម។

“កាលបរិច្ឆេទបណ្ណសន្យារ៉ាប់រងមានសុពលភាពរបស់សមាជិកត្រូវបានធានារ៉ាប់រង” សំដៅដល់ កាលបរិច្ឆេទដែលទឹកប្រាក់កម្ចីត្រូវបានផ្ដល់ពីម្ចាស់បណ្ណសន្យារ៉ាប់រងទៅសមាជិកត្រូវបានធានារ៉ាប់រង និងក្រុមហ៊ុនទទួលបានបុព្វលាភធានារ៉ាប់រង (តែមួយលើក) ហើយក្រុមហ៊ុនយល់ព្រមធានាសមាជិកត្រូវបានធានារ៉ាប់រង។ កាលបរិច្ឆេទនេះ ត្រូវចាត់ទុកថាជាកាលបរិច្ឆេទកិច្ចសន្យាធានារ៉ាប់រងមានសុពលភាព សម្រាប់សមាជិកត្រូវបានធានារ៉ាប់រងក្នុងបណ្ណសន្យារ៉ាប់រងនេះ។

“កាលបរិច្ឆេទផុតកំណត់នៃកិច្ចសន្យាធានារ៉ាប់រង” សំដៅដល់ កាលបរិច្ឆេទដែលកិច្ចសន្យាធានារ៉ាប់រងផុតសុពលភាព។

“កិច្ចសន្យាធានារ៉ាប់រង” សំដៅដល់ កិច្ចព្រមព្រៀងជាលាយលក្ខណ៍អក្សរដែលធ្វើឡើងដោយក្រុមហ៊ុន និង សមាជិកត្រូវបានធានារ៉ាប់រង ដែលតាមរយៈនោះក្រុមហ៊ុនព្រមទទួលនូវហានិភ័យជាក់លាក់ណាមួយ ដោយទទួលមកវិញនូវការបង់បុព្វលាភធានារ៉ាប់រងពីសមាជិកត្រូវបានធានារ៉ាប់រង។ កិច្ចសន្យាធានារ៉ាប់រងរួមមានបណ្ណសន្យារ៉ាប់រង វិញ្ញាបនបត្រធានារ៉ាប់រងអាយុជីវិត ផលិតផលបន្ថែម (ប្រសិនបើមាន) ឯកសារភ្ជាប់ សេចក្តីប្រកាសបន្ថែម ឯកសារគាំទ្រការកែប្រែនៃបណ្ណសន្យារ៉ាប់រង ឬ សំណើសុំផ្លាស់ប្តូររបស់សមាជិកត្រូវបានធានារ៉ាប់រងដែលចុះហត្ថលេខាទទួលស្គាល់ដោយក្រុមហ៊ុន ពាក្យស្នើសុំធានារ៉ាប់រង របាយការណ៍សុខភាពចេញដោយវេជ្ជបណ្ឌិត និង សេចក្តីប្រកាសអំពីសុខភាព ដែលឯកសារទាំងនេះត្រូវចាត់ទុកថាជាកិច្ចសន្យាធានារ៉ាប់រងរវាងម្ចាស់បណ្ណសន្យារ៉ាប់រង និងក្រុមហ៊ុន។

“គ្រោះថ្នាក់” សំដៅដល់ ព្រឹត្តិការណ៍ដែលកើតឡើងភ្លាមៗដោយកត្តាខាងក្រៅដែលមិនមែនជាជំងឺ ហើយដែលលទ្ធផលនោះមិនមែនកើតឡើងដោយចេតនា ឬការតាំងចិត្តរបស់សមាជិកត្រូវបានធានារ៉ាប់រង។ ការធ្វើអត្តឃាត ការបង្ករបួសលើខ្លួនឯង មិនថាមានស្មារតីប្រក្រតី ឬមិនប្រក្រតី មិនត្រូវបានចាត់ទុកជាគ្រោះថ្នាក់នោះទេ។

“ចំនួនទឹកប្រាក់ធានារ៉ាប់រងដែលត្រូវបានរំលស់” សំដៅដល់ ចំនួនទឹកប្រាក់សរុបដែលក្រុមហ៊ុននឹងបង់ទៅឲ្យអ្នកទទួលផល ឬសមាជិកត្រូវបានធានារ៉ាប់រង ក្នុងករណីទទួលមរណភាព ឬពិការភាពទាំងស្រុង និងជាអចិន្រ្តៃយ៍ ដូចមានបញ្ជាក់នៅក្នុងតារាងនៃចំនួនទឹកប្រាក់ធានារ៉ាប់រងដែលត្រូវបានរំលស់របស់បណ្ណសន្យារ៉ាប់រងនេះ។

“តារាងបណ្ណសន្យារ៉ាប់រង” សំដៅដល់ តារាងដែលមានកំណត់ព័ត៌មានលម្អិតនៃបណ្ណសន្យារ៉ាប់រងដែលចេញដោយក្រុមហ៊ុន ដែលត្រូវបានចាត់ទុកជាឯកសារបន្ថែមនៃបណ្ណសន្យារ៉ាប់រងដែលជាផ្នែកមួយនៃកិច្ចសន្យាធានារ៉ាប់រងនេះ។

“តម្លៃទឹកប្រាក់ដែលត្រូវទទួលបានពីការបោះបង់បណ្ណសន្យារ៉ាប់រង” សំដៅដល់ ទឹកប្រាក់(ប្រសិនបើមាន)ដែលក្រុមហ៊ុនត្រូវបង់ទៅឲ្យសមាជិកត្រូវបានធានារ៉ាប់រងដែលបោះបង់បណ្ណសន្យារ៉ាប់រង។

“បណ្ណសន្យារ៉ាប់រង” សំដៅដល់ បណ្ណសន្យារ៉ាប់រងអាយុជីវិតដែលជាឯកសារចងភ្ជាប់កាតព្វកិច្ចតាមផ្លូវច្បាប់ ដែលចេញដោយក្រុមហ៊ុន ដោយមានកំណត់ពីខ្លឹមសារសំខាន់ និងចែងអំពី ខ និងលក្ខខណ្ឌលម្អិត ដែលបានព្រមព្រៀងរវាងក្រុមហ៊ុន និងសមាជិកត្រូវបានធានារ៉ាប់រងនៅក្នុងកិច្ចសន្យាធានារ៉ាប់រង។

“បុព្វលាភធានារ៉ាប់រង” សំដៅដល់ ចំនួនទឹកប្រាក់ដែលសមាជិកត្រូវបានធានារ៉ាប់រងត្រូវបង់ទៅឲ្យក្រុមហ៊ុន ជាថ្នូរនឹងបណ្ដាកាតព្វកិច្ចដែលរ៉ាប់រងដោយក្រុមហ៊ុន។

“ពិការភាពទាំងស្រុង និងជាអចិន្ត្រៃយ៍” សំដៅដល់ សមាជិកត្រូវបានធានារ៉ាប់រងទទួលរងការបាត់បង់ទាំងស្រុង ឬពិការភាពជាអចិន្ត្រៃយ៍ និងមិនអាចជាសះស្បើយជារៀងរហូតនូវ៖

- ដៃទាំងពីរ ឬ
- ជើងទាំងពីរ ឬ
- ដៃម្ខាង និងជើងម្ខាង ឬ
- ភ្នែកទាំងពីរ ឬ
- ភ្នែកម្ខាង និងដៃម្ខាង ឬ
- ជើងម្ខាង និងភ្នែកម្ខាង។

ក្នុងនិយមន័យនេះ ការបាត់បង់ទាំងស្រុង និងមិនអាចជាសះស្បើយបានជារៀងរហូតនូវ (i) ភ្នែកម្ខាង ឬទាំងពីរ សំដៅដល់ការបាត់បង់សរីរាង្គភ្នែកម្ខាង ឬភ្នែកទាំងពីរ ឬពិការភ្នែកទាំងស្រុង (ii) ដៃម្ខាង ឬទាំងពីរ សំដៅដល់ការបាត់បង់ផ្នែកខាងលើនៃកដៃ និង (iii) ជើងម្ខាង ឬទាំងពីរ សំដៅដល់ការបាត់បង់ផ្នែកខាងលើនៃកជើង។

ក្នុងករណីមិនអាចកម្រើកបានជាអចិន្ត្រៃយ៍ ស្ថានភាពនៃពិការភាពទាំងស្រុង និងជាអចិន្ត្រៃយ៍ ត្រូវតែមានការបញ្ជាក់ច្បាស់លាស់ពីវេជ្ជបណ្ឌិតនៅមណ្ឌលសុខភាពកម្រិតឃុំ/សង្កាត់ ឬខ្ពស់ជាងនេះ ក្នុងរយៈពេលមិនតិចជាង ១៨០ ថ្ងៃ និងមិនលើសពីរយៈពេល ២៧០ ថ្ងៃ ចាប់ពីពេលមានគ្រោះថ្នាក់ជាយថាហេតុ ឬគិតចាប់ពីថ្ងៃដែលស្ថានភាពពិការភាពត្រូវបានបញ្ជាក់ត្រឹមត្រូវ។

ក្នុងករណីដែលបាត់បង់ទាំងស្រុងនូវដៃម្ខាង ឬទាំងពីរ ឬជើងម្ខាង ឬទាំងពីរ ឬភ្នែកម្ខាង ឬទាំងពីរ ការបញ្ជាក់បែបនេះអាចធ្វើឡើងនៅក្នុងរយៈពេលណាមួយក៏បាន ។

“ម្ចាស់បណ្ណសន្យារ៉ាប់រង” សំដៅដល់ នីតិបុគ្គលដែលជាអ្នកផ្ដល់កម្ចី និងជាអ្នកទទួលផលទីមួយ ដូចមានបញ្ជាក់នៅក្នុងបណ្ណសន្យារ៉ាប់រង។

“វេជ្ជបណ្ឌិត” សំដៅដល់ វេជ្ជបណ្ឌិតសម័យទំនើប ដែលមានសញ្ញាបត្រវេជ្ជសាស្រ្តទទួលស្គាល់ដោយក្រសួងសុខាភិបាល និងបានចុះបញ្ជីស្របច្បាប់នៅគណៈគ្រូពេទ្យកម្ពុជា ដើម្បីប្រកបវិជ្ជាជីវៈព្យាបាលតាមបែបវេជ្ជសាស្រ្ដ ឬ សេវាកម្មវះកាត់ ដែលមិនមែនជាសមាជិកត្រូវបានធានារ៉ាប់រង ឬ សមាជិកគ្រួសារ (រាប់ទាំងបុព្វញាតិ និងបច្ឆាញាតិ) របស់សមាជិកត្រូវបានធានារ៉ាប់រងឡើយ។

“វិញ្ញាបនបត្រធានារ៉ាប់រងអាយុជីវិត” សំដៅដល់ ឯកសារដែលចេញដោយក្រុមហ៊ុន ដើម្បីបញ្ជាក់ថាសមាជិកត្រូវបានធានារ៉ាប់រងបានទិញការធានារ៉ាប់រងពីក្រុមហ៊ុន។

“សមាជិកត្រូវបានធានារ៉ាប់រង” សំដៅដល់ ​សមាជិក​ដែល​មាន​សិទ្ធិ​ ដែល​ចុះឈ្មោះ​ក្នុង​គម្រោង​ធានារ៉ាប់រង​​។

“អ្នកទទួលផល" សំដៅដល់ បុគ្គលដែលបានកំណត់នៅក្នុងពាក្យស្នើសុំធានារ៉ាប់រងដោយសមាជិកត្រូវបានធានារ៉ាប់រងឲ្យធ្វើជាអ្នកទទួលផល យោងតាមកិច្ចសន្យាធានារ៉ាប់រង និង ជាបុគ្គលដែលនឹងត្រូវទទួលអត្ថប្រយោជន៍ទៅតាមបណ្ណសន្យារ៉ាប់រង បន្ទាប់ពីសមាជិកត្រូវបានធានារ៉ាប់រងទទួលមរណភាព ឬពិការភាពទាំងស្រុង និងជាអចិន្ត្រៃយ៍។

 “អ្នកទទួលផលទីមួយ” សំដៅដល់ នីតិបុគ្គលដែលជាអ្នកផ្ដល់កម្ចី និងជាម្ចាស់បណ្ណសន្យារ៉ាប់រង។

“អ្នកទទួលផលទីពីរ” សំដៅដល់ បុគ្គលដែលត្រូវបានបញ្ជាក់នៅក្នុងពាក្យស្នើសុំធានារ៉ាប់រងដោយសមាជិកត្រូវបានធានារ៉ាប់រងឲ្យធ្វើជាអ្នកទទួលផល ដោយយោងតាមកិច្ចសន្យាធានារ៉ាប់រង ហើយដែលនឹងទទួលបានអត្ថប្រយោជន៍ទៅតាមបណ្ណសន្យារ៉ាប់រងនេះ បន្ទាប់ពីកាត់ចេញនូវចំនួនទឹកប្រាក់ដែលត្រូវបង់ទៅឲ្យអ្នកទទួលផលទីមួយ(ប្រសិនបើមាន) បន្ទាប់ពីមរណភាពរបស់សមាជិកត្រូវបានធានារ៉ាប់រង។

"ឥណវន្ត” សំដៅដល់ កូនបំណុលរបស់ម្ចាស់បណ្ណសន្យារ៉ាប់រង ដែលខ្ចីកម្ចីពីម្ចាស់បណ្ណសន្យារ៉ាប់រង។